Jer 3 | NdeIBE | STEP | “Indoda ingehlukana lomkayo ayitshiye endele kwenye indoda, kufanele imbuyise futhi na? Kambe ilizwe kalingeke langcoliswa kakhulukazi na? Kodwa wena usuphile njengewule elilezithandwa ezinengi – kambe khathesi ungabuyela kimi na?” kutsho uJehova.

Jeremiah 3

1 “Indoda ingehlukana lomkayo ayitshiye endele kwenye indoda, kufanele imbuyise futhi na? Kambe ilizwe kalingeke langcoliswa kakhulukazi na? Kodwa wena usuphile njengewule elilezithandwa ezinengi – kambe khathesi ungabuyela kimi na?” kutsho uJehova.

2 “Khangela emiqolweni elugwadule ubone. Kungaphi lapho ongazange udlwangululwe khona? Emigwaqweni wahlala ulindele izithandwa, wahlala njengomhambuma enkangala. Ulingcolisile ilizwe ngobuwule bakho langobubi bakho.

3 Ngalokho imikhizo imisiwe, lezulu lentwasa kalinanga. Ikanti wena ulobugagu bewule, awulanhloni.

4 Kawungibizanga khathesi nje wathi, ‘Baba, mngane wami kusukela ebutsheni bami,

5 uzahlala uzondile kokuphela na? Ulaka lwakho luzaqhubeka kokuphela na?’ Le yindlela okhuluma ngayo, kodwa wenza konke okubi ongakwenza.”

U-Israyeli Ongathembekanga

6 Ekubuseni kwenkosi uJosiya, uJehova wathi kimi, “Ukubonile yini okwenziwe ngu-Israyeli ongathembekanga? Usekhwele phezu kwamaqaqa wonke aphakemeyo langaphansi kwezihlahla zonke eziluhlaza wafebela khona.

7 Ngacabanga ukuthi emva kokuba esenze konke lokhu uzaphinda eze kimi, kodwa kabuyanga, lodadewabo ongathembekanga uJuda wakubona lokho. 8 U-Israyeli ongathembekanga ngamnika incwadi yakhe yesehlukaniso ngamxotsha ngenxa yobufebe bakhe bonke. Kodwa ngabona ukuthi udadewabo ongathembekanga, uJuda, kesabanga, laye wasuka wayafeba. 9 Ngenxa yokuthi ububi buka-Israyeli babungatsho lutho kuye, wangcolisa ilizwe wakhonza amatshe lezihlahla. 10 Kukho konke lokhu, udadewabo ongathembekanga uJuda kabuyelanga kimi ngenhliziyo yakhe yonke, kodwa ngokuzenzisa nje kuphela,” kutsho uJehova.

11 UJehova wathi kimi, “U-Israyeli ongathembekanga ungcono kuloJuda ongelaqiniso. 12 Hamba, uyememezela ilizwi leli ngasenyakatho uthi: “ ‘Phenduka Israyeli ongathembekanga,’ kutsho uJehova, ‘Kangisayikukuhwaqela futhi, ngoba ngilesihawu,’ kutsho uJehova. ‘Kangiyikuthukuthela kokuphela.

13 Vuma icala lakho nje kuphela – wahlamukela uJehova uNkulunkulu wakho, uhlakazelele umusa wakho kubonkulunkulu bezizweni ngaphansi kwezihlahla zonke eziluhlaza, njalo kawaze wangilalela,’ ” kutsho uJehova.

14 “Phendukani, bantu abangathembekanga,” kutsho uJehova, “ngoba ngingumyeni wenu. Ngizalikhetha – oyedwa edolobheni lababili kusendo – ngililethe eZiyoni. 15 Laphoke ngizalinika abelusi abathandwa yimi, abazalikhokhela ngokwazi langokuqedisisa.

16 Ngalezozinsuku, ubunengi benu sebande kakhulu elizweni,” kutsho uJehova, “abantu kabasayikuthi, ‘Ibhokisi lesivumelwano sikaJehova.’ Kaliyikufika emicabangweni yabo kumbe likhunjulwe; kaliyikusweleka, njalo akuyikwenziwa elinye futhi. 17 Ngalesosikhathi iJerusalema bazalibiza ngokuthi yisiHlalo Sobukhosi sikaJehova, njalo izizwe zonke zizabuthana eJerusalema ukuba zihloniphe ibizo likaJehova. Kabasayikulandela inkani yezinhliziyo zabo ezimbi. 18 Ngalezozinsuku indlu kaJuda izahlangana leka-Israyeli, njalo ndawonye, zivela elizweni elisenyakatho, zizakuza elizweni engalinika okhokho benu ukuba libe yilifa labo.

19 “Mina ngokwami ngathi, “ ‘Kade ngingathaba kakhulu ukuliphatha njengamadodana, ngilinike ilizwe elifunekayo, ilifa elihle kakhulu ezizweni zonke.’ Bengicabanga ukuthi lizangibiza ngokuthi ‘Baba’ njalo lingaphambuki ekungilandeleni.

20 Kodwa njengowesifazana ongathembekanga kumkakhe, ubungathembekanga kanjalo kimi wena ndlu ka-Israyeli,” kutsho uJehova.

21 Ilizwi liyezwakala emiqolweni elugwadule, ukukhala lokuncenga kwabantu bako-Israyeli, ngoba izindlela zabo bazonile bakhohlwa loJehova uNkulunkulu wabo.

22 “Phendukani, bantu abangathembekanga; ngizalelapha ukungathembeki kwenu.” “Yebo, sizakuza kuwe, ngoba unguJehova uNkulunkulu wethu.

23 Impela umsindo wokukhonza izithombe emaqaqeni lasezintabeni uyinkohliso; impela kuJehova uNkulunkulu wethu kulensindiso ka-Israyeli.

24 Kusukela ebutsheni bethu onkulunkulu abalihlazo badlile izithelo zamandla abobaba – imihlambi yezimvu zabo leyezinkomo zabo, amadodana abo lamadodakazi abo.

25 Kasilaleni phansi silenhloni, siphathwe lihlazo lethu. Ngoba sonile kuJehova uNkulunkulu wethu, thina sonke kanye labokhokho bethu; kusukela ebutsheni bethu kuze kube lamhla, kasimlalelanga uJehova uNkulunkulu wethu.”